بعد مرور فتره من الزمن ليست بالقليله على توليه إدارة الكرسى , لم يستطيع سيادته
ان يبدى اى أماره انه معلم , او ان ليه خبره بأمور الكرسى رغم خبراته المتراكمه
وعمله فتره كبيره فى المجال , كل الناس _واخده بالها _ من الموضوع ده حتى اللى
شغالين تحت ايده لكن النكته انهم ساكتين , والناس مستسلمين لقراراته اللى دايما
بتطلع غلط وبتبان عليهم وبيبقى واضح ع شكلهم , ولكن لسان حالهم اهو احسن من
غيره !!
فشل سيادته انه يدير الناس اللى معاه او اللى بيتعامل معاهم ومسؤلين منه خصوصا
انهم بين إيديه وهو المسئول الاول والاخير عنهم , ده غير ان معداته دايما بايظه او
نسى يعملها صيانه او بطل يشترى حاجات جديده يواكب بيها العصر والعلم وفضل زى
ماهو محلك سر , الغريب ان صاحب الليله نفسه ساكت عليه , لدرجة ان كل الناس
بتسأل عن السبب واحتارت فى الموضوع ده , اللى يقولك هو ناوى يجيب واحد جديد
بس مستنى شويه , واللى يقولك طالما الامور ماشيه ومفيش شكوى من الناس اللى
معاه يبقى خلاص , الغريب ان الناس اللى معاه لما تسألهم عن سر سكوتهم يقولك
خلينى ف حالى وادينا بناكل عيش !!
الموضوع ده حير الناس فى الشارع والحاره لدرجة ان الناس كلها بدأت تسأل عن سر
تمسك صاحب المحل بالاسطى الحلاق اللى شغال فى المكان , وهيتجننوا ان اللى
شغالين معاه ساكتين وراضيين , رغم ان كل الناس اللى بيتعاملوا معاه بيشتكوا من
غباءه وقلة خبرته , بس بعد شويه عرفوا ان العيب مش فى صاحب المحل ولا الحلاق
اللى بيدير المحل ... العيب فى السيستم كله , وربنا يهدى ويصلح الحال , عن نفسى
بفكر اغير الحلاق ده لانه بوظلى شعرى اخر مره , اللى يعرف حلاق كويس يقولى
على مكانه وليه الاجر والثواب :)
ليست هناك تعليقات:
إرسال تعليق